Ե՞րբ դիմել բժշկի:

Երեխան պետք է այցելի մանկաբույժի կողմից անցկացվող բոլոր հերթական զննումներին։ Այդ այցերի ընթացքում հետևում են երեխայի զարգացմանը՝ քաշ, հասակ, գլխխի շրջագիծ։

Պետք է շտապ կերպով դիմել բժիշկի, եթե`

• երեխան ընկճված է, թույլ, պասիվ, չի արթնանում ուտելու համար, հրաժարվում է կերակրվելուց,

• գրգռված է, շարունակ լաց է լինում,

• կան շարունակական փսխումներ, կղանքի բնույթի, հոտի, քանակի, հաճախականության փոփոխություն,

• առկա են ջերմաստիճանի տատանումներ (37,3˚C-ից բարձր, 36,3˚C-ից ցածր), որոնք չեն կարգավորվում նախնական հնարավոր պատճառների շտկումից հետո:

Հետծննդյան է կոչվում ծննդաբերությանը հաջորդող 6-8 շաբաթվա ժամանակահատվածը: Այդ ընթացքում մոր օրգանիզմում, հոգում բավական մեծ փոփոխություններ են կատարվում: Դա գերզգայունության շրջան է, որը պայմանավորված է նոր իրավիճակին հարմարվելու անհրաժեշտությամբ. ամեն ինչ նոր է, օրգանիզմի հորմոնները վերակառուցվում են, մոր կողքին է փոքրիկը, որը շատ ուշադրություն, խնամք է պահանջում: Կանայք տարբեր կերպ են հարմարվում այս շրջանին, մի քանիսը բացարձակապես անուժ են, շատ են քնում: Մյուսները էյֆորիայի մեջ են ընկնում, չեն կարողանում աչք կտրել փոքրիկից:

Մոր և մանկան համատեղ կեցությունը օգնում է ամրացնել երեխայի վստահությունը, քանի որ մայրը նրան կերակրում է լաց լինելու առաջին իսկ պահին: Արդյունքում փոքրիկներն իրենց սիրված և հասկացված են զգում:

Ինչու՞ եմ ինձ այսպես զգում․ հետծննդաբերական հոգեբանական վիճակներ

Հուզական փոփոխությունները նորմալ են ծննդաբերությունից հետո առաջին շաբաթների ընթացքում և կանանց մեծ մասը ունենում է նման զգացողություններ։ Մայրը կարող է ունենալ ինտենսիվ տխրության զգացումներ՝ ուժեղ հուզական պոռթկումների հետ մեկտեղ: Այս զգացմունքները պետք է ընդունեն և հասկանան շրջապատի բոլոր անդամները և խուսափեն մեղադրելուց կամ քննադատելուց։

Այս ժամանակահատվածում մայրը մեծ աջակցության և խրախուսանքի կարիք ունի, որպեսզի կարողանա հեշտությամբ հարմարվել իր նոր դերին և ընդունի հղի կնոջից մայր լինելու կտրուկ անցումը:

“Հետծննդաբերական տխրությունը” ամենայն հավանականությամբ կապված է ձեր օրգանիզմում կտրուկ հորմոնալ փոփոխությունների հետ, որը կարող եք սկսել զգալ ծննդաբերելուց մի քանի օր անց: Կարող է նեղված և լարված լինեք երեխայի մասին հոգ տանելու հարցում, իսկ դրանից հետո էլ մեղքի զգացում ունենաք նման մտքեր ունենալու համար: Մի քանի օր անց դուք ամենայն հավանականությամբ ձեզ լավ կզգաք, հատկապես եթե լավ աջակցություն և խնամք եք ստանում:

թեթև ընկճախտը և փոփոխվող տրամադրությունը շատ տարածված են նոր մայրերի մոտ, այնքան տարածված, որ նույնիսկ ստացել են “հետծննդաբերական տխրություն” (baby blues) անվանումը: Մայրերի գերակշիռ մեծամասնությունը ունենում է հետծննդաբերական տխրության նշաններից մեկը կամ մի քանիսը՝ փոփոխվող տրամադրություն, տխրություն, քնելու հետ կապված դժվարություններ, դյուրագրգռություն, ախորժակի փոփոխություններ, կենտրոնանալու հետ կապված դժվարություններ: Հետծննդաբերական տխրության նշանները սովորաբար հայտնվում են ծննդաբերությունից մի քանի օր հետո և կարող են տևել մի քանի օրից մինչև մի քանի շաբաթ:

Հետծննդաբերական տխրության նշաններն են՝

• Քնելու հետ կապված խնդիրներ,

• Փոփոխվող տրամադրություն,

• Լացելու ցանկություն,

• Տագնապի զգացում,

• Տխրություն,

• Հուսահատության զգացում,

• Դյուրագրգռություն,

• Կենտրոնանալու հետ կապված դժվարություններ:

Եթե առաջացել է հետծննդաբերական ընկճախտ, այն կարելի է բուժել գինեկոլոգ-մանկաբարձի կողմից սահմանած բուժման կուրսն անցնելով: Խորհրդատվությունը և համապատասխան աջակցություն տրամադրող խմբերը, կանոնավոր մարզվելը, ճիշտ սննդակարգը և աջակցող ընտանիքը բուժման կարևոր մաս են կազմում: