Հոգեկան առողջությունը մարդու ընդհանուր առողջության անբաժան մասն է։ Այն ներառում է մտածողության, զգացմունքների, վարքի և հարաբերությունների հավասարակշռությունը։ Որպես կենսական ռեսուրս՝ հոգեկան կայունությունն ապահովում է սթրեսների դիմակայման, որոշումներ կայացնելու, աշխատելու և համայնքում ներգրավված լինելու կարողությունը։

Կանանց համար հոգեկան առողջությունը հատկապես կարևոր է՝ հաշվի առնելով այն բազմաշերտ ճնշումները, որոնց նրանք հաճախ ենթարկվում են՝ սոցիալական դերերի, սեռային խտրականության, ընտանեկան կամ աշխատանքային բեռների և այլ խնդիրների համատեքստում։

Հոգեկան առողջությունը նաև սոցիալական և գենդերային արդարության հարց է։ Կանայք հաճախ բախվում են այնպիսի պայմանների, որոնք խաթարում են հոգեկան հավասարակշռությունը՝ ներառյալ․

• Ընտանեկան, սեռական և տնտեսական բռնության փորձառություններ

• Սոցիալական խարան հոգեկան առողջության խնդիրների շուրջ

• Աշխատանքային պայմանների ճկունության պակաս և կրկնակի բեռ՝ տուն–աշխատանք

• Աջակցության ցանցերի սահմանափակ հասանելիություն՝ հատկապես գյուղական կամ սահմանամերձ շրջաններում

Հոգեկան առողջությունը պահանջում է նույնքան խնամք, որքան ֆիզիկական առողջությունը։ Իրազեկվածությունն ու ինքնախնամքի մշակույթի ձևավորումը կարող են կանխել բարդ խնդիրները և նպաստել կայունությանն ու բարեկեցությանը։ Հոգեկան առողջությանը նպաստող միջավայրի ձևավորումը՝ ընտանեկան, կրթական և աշխատանքային հարթակներում, կարևոր ներդրում է կանանց հավասարության և լիարժեք ներառման գործում։